XEBE ATENCIARI ELKARRIZKETA

        Kaixo lagunok:

        Hemen dakarkizuet Xebe Atenciari egindako elkarrizketa, goza ezazue.

       

1.- Nola sartu zinen bikoizketaren munduan?

19 urte nituen. Ikasketak utziak nituen eta, ETB martxan hastekotan zenez, euskerazko bikoizketa ere hastekotan zen, eta probetara aurkeztu nintzen. Xeberrik egin zidan proba. Gainditu nuen, gero ikastaro labur bat eman ziguten eta holaxe, poliki-poliki bikoizketako benetako lantxoak eginez, konturatu orduko, bikoizketaren munduan sartuta nengoen. 

2.- Lehendabizikoz elkartu zinetenean, bazenekiten zer bikoiztuko zenuten ala sorpresa izan zen?

Ez, bikoiztera joateko deitzen dizutenean, normalean ez dakizu zer bikoiztu behar duzun, ez bada zerbait berezia.

3.- Zeren arabera erabakitzen da zein pertsonaia bikoiztuko duzun?

Hori bikoizketa-zuzendariak erabakitzen du hainbat alderdiren arabera: ahotsa, interpretazio mota, adina, ze bikoiztaile dauden libre, etab.

4.- Nola prestatzen da ahotsa jarriko diozun pertsonaia baten papera?

Ez da prestatzen. Zuzenean egiten duzu. Bikoizketa-salara sarzen zara, batzuetan, ez beti, zuzendariak jarraibide batzuk ematen dizkizu, jatorrizko irudiak ikusten dituzu eta... aurrera.

5.- Son Goku eta Son Gohan bikoiztu zenituen. Ezberdintasunik nabaritu zenuen bi pertsonaien artean?

Egia esan, ez handirik. Beharbada, Goku aukeran txoriburuagoa edo da, baina, orokorrean, nahiko antzekoak dira. Izan ere, jatorrizkoan ere, oker ez banago, bikoizle berak egiten ditu, eta, beraz, antzeko ahotsa darabilte.

6.- Garai hartan hasiberriak izanda, nola hobetu zenituzten ahotsak eta abar? ( bizkoizketaz ezer jakin gabe joan baitzineten, oker ez banago)

Inoiz ez dugu prestaketa berezirik egin, ez prestakuntzarik jaso. Asko jota, bakoitzak bere aldetik zeozer, foniatraren batekin ahotsa landu edo holako zerbait, baina, orokorrean, lanean arituz ikasi duguna besterik ez daukagu.

7.- Euskal bizkoizleek familia bat osatu zenutela esan daiteke?

Ez, jende asko mugitzen den leku guztietan bezala, bikoizketan ere denetik dago, rollo onak eta txarrak. Normalean, lan asko dagoenean, giro hobea izan ohi da, eta lan gutxi dagoenean, eskasagoa, baina familia bat osatu..., inondik inora ere ez.

8.- Zein da gogoratzen duzun pertsonaiarik zailena, bikoiztu dituzun guztietatik?

Zalantzarik gabe, mutil gazte bat, “Equus” izeneko pelikula batean. Gazte zoro bat zen, eta pelikulako protagonista zen,  Richard Burtonek egiten zuen psikiatrarekin batera. Eszena batzuk oso zailak izan ziren: oso luzeak zirelako,  ezin zen-eta inon moztu, eta gainera oihu piloa eta gauza arraro asko egiten zituelako. Akorduan daukat zelan ordubete baino gehiago egon ginen take bat egiteko. Baina, tira, azkenean, oso ondo gelditu zen, nik uste.

9.- Euskal gazte askoren heroia da Son Goku. Zer sentitzen duzu garai batean umeak eta orain helduak diren horien heroia izateaz?

Ba, bitxia egiten zait, ikusirik gaur egungo heldu askok Son Goku ezagutzen dutela, edo esaten didatenean eurak Son Goku ikusiz hazi zirela. Denboraren joana ere gogorarazten dit horrek, Dragoi Bola bikoizten hasi gineneko garaiak etortzen zaizkidalako burura, eta kontuan izan behar da Dragoi Bola duela hogeita hamar urte hasi ginela bikoizten.

10.- Zer sentitzen duzu hitzaldietan jendeak galderak euskaraz egiten dizkizutenean?

Euskeraz egiten dizkidatelako galdetzen badidazu, ba, zer esatea nahi duzu, normala iruditzen zaidala, ze Euskal Herrian Dragoi Bola ezagutzen dutenek, gehienek behintzat, euskeraz ezagutu dute, eta beraz, horrek suposatzen du euskaldunak direla.

11.- Nolakoa izan da euskal bikoizketaren eboluzioa?

Ezin txarragoa. ETB-k ez du jakin bikoizketa-politika zentzuzko bat egiten, eta bikoizketa-estudioek dena kakaztu dute, kudeaketa txarrez eta diru-gosez edo. Tristea da, baina dena pikutara joan da.

12.- Zein pertsonaia gustatuko litzaizuke bikoiztea?

Ez dut inoiz pentsatu. Niretzat,  dudan ahotsagatik, umeak eta gaztetxoak dira egokiak, eta gogoratzen dut Spielbergen pelikula bat, Empire of the sun, zeinetan protagonista mutiko bat zen, Christian Balek antzeztua, eta, ikusi nuenean, pentsatu nuen bikoiztea gustatuko zitzaidala.